U
Taravu

U Taravu è a so storia

U Taravu hè un fiumi longu d’à pocu pressu 65 chilometri. Terzu fiumi di Corsica, piglia i so radichi à 1580 metri d’altezza, à u nordu di u Monti Grossu (1895 metri d’altezza), nantu à a cumuna di Palleca. L’urientazioni generali di u so corsu parta da u Nordu Levanti versu u Mezu Punenti pà ciuttà si in u mari mediterraneu à u niveddu di u golfu di u Valincu, nantu à i cumuni di Sarra di Farru è d’Ulmetu.

D’un puntu di vistu geulogicu, l’acquapendi, d’una superficia di guasi 490 chilometri quadrati, chì copra o aduniscia 31 cumuni, appartena integralmenti à a Corsica erciniana, chì ne franca u sigamentu sudu supranatu da i plutoni. Com’è a maiò parti di a Corsica erciniana, u sustratu di l’acquapendi hè largamenti cumpostu da granitigni.

L’elementi di a storia è di l’evuluzioni di a conca di u Taravu in i seculi passati, mosciani chì una sucetà agrupasturali stallata in a preistoria, (fermani assai testimonii com’è u situ preistoricu di Filitosa), hà pian’pianinu pigliatu in contu l’ambiu naturali pà divintà una sucetà agrusilvupasturali, sbucchendu, versu u XVu seculu, nantu à a creazioni d’una decina di paesi maiò in a alta vaddi. Issi paesi riprisentavani cumunità chì sparghjiani a so attività trà a vaddi d’inghjò è l’alta muntagna (addevu è agricultura da pudè campà). A sbucciata d’una classa di pruprietarii tarrani sedentarii, chè i più ricchi aviani da imponasi prestu com’è i pussessori d’un puteri puliticu, finiscia à a fini di u XVIIIu seculu.

U sviluppu demugraficu di u XIXu seculu, scambia assai u spaziu è l’elementi suciali di l’alta vaddi induva u paesi t’hà una funzioni impurtanti. A pupulazioni di l’alta vaddi doppia in cent’anni, passendu à guasi ottu mila parsoni à l’iniziu di u vintesimu seculu. U bassu Taravu, sin’à quì duminiu indivisu da i cumunità pasturali di l’alta vaddi, pidda un’identità prupria cù l’arradichera prugressiva, a spartera  di i tarri è a custituzioni di cumuni indipendenti.

In u vintesimu seculu, particularmenti dopu à a guerra di u 1914-1918, a muntagna hè « scartata ». A vaddi di u Taravu hè di menu in menu rurali, ciò chì sbocca nantu à l’evuluzioni di u paisagiu è una prugressioni maiò di a machja. Eppuru, oghji dinò, u rughjoni di u Taravu t’hà parechji carti maestri, ch’eddu custituiscia un insemi geugraficu, ambientali, storicu, umanu è ecunomicu, induva u sintimu d’appartena à una tarra hè arradicatu. Di fattu, « pinsà u tarritoriu », à traversu a vaddi, ci pari più cà mai, pertinenti.

Caratteru salvaticu di u fiumi

U Taravu crescia à mezu à una musaica d’abbuscamenti è machji naturali, è di settori d’agricultura estensiva. A maiò parti di u corsu di u fiumi hè supranata da abbuscamenti è machji chì a variabilità spechja a dispusizioni naturali di i vegetazioni, da u pianu subalpinu sin’à u pianu termomediterraneu. Solu, a piaghja alluviali chì custituiscia a parti a più avaddu hè largamenti accuppata da pratulini pasculati. Qualchì lenza di vigna è pochi settori cultivati o accunciati pà l’abitazioni ghjunghjani à cumplettà issa musaica, senza quantunqua accuppà una superficia maiò. L’insemi forma un paisagiu cù un rilievu armuniosu, taddatu in certi parti, da petri granitichi risistanti à l’erusioni è chì formani avanzati scugliosi nantu à i pughjali è travi in u corsu di u fiumi. Issi diferenti cuntesti ambientali definisciani parti cuntrastati chì t’ani caratteristichi fisichi (idrudinamicu, righjimu sendentariu…) è biulogichi (natura di a furesta rivularia, putenzialità eculogichi…). L’insemi di u Taravu (fora di a zona di u sboccu) hè dunqua favurevuli à u sviluppu di a truita. À issu puntu, u Taravu prisenta i caratteristichi d’una vadina di prima categuria piscicula. Hè difesu di piscà nantu à parechji parti d’aghjunghenti di u Taravu, què pà prutteghja a truita macrostigma, emblematica di Corsica.

L’acquapendi di u Taravu aduniscia spazii diversi marcati da una diversità maiori di spazii naturali chì t’ani un valori ambientali forti ( sei ZNIEFF di tipu I, cinqui ZNIEFF II è cinqui siti Natura 2000.

U Parcu Naturali di Corsica si sparghja nantu à 20500 ettari (6 % di u spaziu tutali di u PNRC) è copra 11 cumuni di l’altu è u mediu Taravu. Cusì, assai spezi vegetali è animali si sviluppani nantu à l’acquapendi. S’asgiscia di pianti, arburi, arbureddi, aceddi, rettili, mignoculi, amfibii o mammiferi. Mori spezi sò d’altrondi indemichi, ricercati, prutteti è certi volti, i trè à tempu !

D’altrondi, dipoi u 2017, u fiumi Taravu benefizeghja di a marca « fiumiceddi salvatichi », attribuata da un cumitatu scentificu chì certificheghja u caratteru pruttetu è equilibratu d’issa vaddi.

Rinnuvellamentu è stinzioni à niveddu trè di a marca « Fiumiceddi Salvatichi » Taravu

In Francia, solu 7 % di i piani d’acqua sò in « statu bonu eculogicu » à u sensu di a Direttiva Quadra nantu à l’Acqua è pudemi stimà à menu d’unu per centu, i fiumiceddi chì pudariani essa qualificati di « Salvatichi ».

U scopu di a marca «Siti fiumiceddi salvatichi » hè d’essa un arnesi à u serviziu di i ghjistunarii di l’ecusistemi d’acqua currenti pà migliurà a pruttezzioni è a cunservazioni di i fiumiceddi chì t’ani un funziunamenti eculogicu bonu.

Includa i nuzioni di :

• Qualità di u statu di priservamentu di l’ecusistema
• Ricunniscenza è pagamentu di l’attori nantu à i tarritorii pà a gestioni esempiari di u fiumiceddu.
• Pruttezzioni rinfurzata aldilà di l’ughjettivi rigulamentarii isciuti da a DCE (ghjunta à u « statu bonu », classamenti, ecc…)
• Vulintà cullettiva spartuta in l’azzioni di priservamentu (guvernanza)
• Valori ecunomicu forti di u fiumiceddu (servizii ecusistemichi, attratività di u tarritoriu…)
• Valurisazioni di u tarritoriu ind’una reti

Serva à sviluppà, à tempu, una marca di ricunniscenza à u publicu (qualità ambientali), una distinzioni pà i ghjistunarii (pescadori, Parcu Naturali…) è una valurisazioni cullettiva d’un tarritoriu eccezziunali.

Hè una marca francesi chì si traducia è si sparghja à pocu à pocu à u niveddu aurupeu.

Da prutteghja a so natura è a so ricchezza ambientali, u Taravu fù u prima fiumi corsu à riceva issa distinzioni di farraghju u 2017 : una marca « Siti

Fiumiceddi Salvatichi » di niveddu 2. Quidda si scrivia, tandu, ind’un prughjettu di tarritoriu forti cù un prugramma d’azzioni chì vulia prutteghja u Taravu, ma dinò valurizà a so vaddi, piazza maori di cunservazioni. Dapoi, diferenti uperazioni sò stati purtati, ani permessu di sensibilizà a pupulazioni di l’acquapendi à l’imbuschi di ricunquista di a qualità di l’acqui ma dinò di sottulineà l’arradichera di l’abitanti à a pruttizzioni di u so fiumiceddu. Da rinfurzà iss’azzioni, un filmu « Taravu, una vaddi in lascita » è assistamenti diversi di situ naturali sò stati realizati, fendu d’issu fiumi un tarritoriu cù un’attrattività à prò d’un sviluppu durevuli.

Issi resultati significativi rinfurzani a vodda di cuntinuà à fà spampillà l’imagini di a vaddi pà a quali una marca di tarritoriu hè stata creata. Di ghjinnaghju u 2022, a cullettività di Corsica hè stata fiera di pudè cuntinuà à travaddà à u priservamentu è a valurisazioni d’issa ricchezza cù u rinnuvellamentu di a marca pà cinqui anni (dicembri di u 2026). una fiertà tamanta masimu chì u Taravu passa à una marca di niveddu 3. Cusì, faci parti di  i trè fiumiceddi chì ani issa certificazioni.

Vede ancu : le site “rivières sauvages”