I nostri
Valori
Hè una tarra di tradizioni a vaddi di u Taravu, chì porta in sè mondi vistighi di u so passatu.
I stantari di A Filitosa sò tistimoni di una prisenza umana dipoi a prestoria.
Hà parmissu u Taravu à l’Omini di campà
par seculi è seculori in armunia cù a vaddi.
Sparghjendu risorsi minerali è vighjitali, ricalendu una varietà tremenda di paisaghji fiurittati da furesti, prati, machja è piaghji, purghjendu ogni ghjornu serenità è divizia, u Taravu hà parmissu à l’Omini di campà par seculi è seculori in armunia cù a vaddi.
Da sta leia cù u passatu è da u so affettu par una natura dancia, ani tandu sapiutu fà campà sapè fà, sapè campà è sapè essa di quiddi. Si mantena o rinascia l’artigianatu : cultelli, tarrami, meli, castagni, robba purcina, casgi, pianti aromatichi sò tanti prudutti chì omu pò sparta cù l’amichi, trà ghjovani è più vechji, è cù visitadori dinò. Parchì l’accolta è a cunvivialità ani quì radichi prufondi, vivi. Ognunu si senti fieru di un’ identità accertata è sprimi a so voglia di fà scopra un tarritoriu sputicu.
A scumessa di mantena vivi i tradizioni pidda forza ormai cù una brama crisciuta di ricunniscenza è d’apartura à attività novi chì rispettani in veru u fiumi è l’aienti di u locu.
Seculi dopu à seculi,
Sbucciata di biddezza schietta, sublimi.
Ricunnoscia i servizi resi da u Taravu, rivindicà u rispettu di a natura è l’umiltà davanti à u fiumi, appaghjà attività è naturalità, priservà è valurizà a biodiversità…
Cussì sò i principi di a vita nantu
à u tarritoriu.
A vaddi di u Taravu pussedi una diversità naturali è salvatica di l’altru mondu : muntagni induva nasci u fiumi sin’à u mari, un mondu vivu chì ùn pianta mai di smiraculà l’aienti chì spasseghja. Hè un mondu à tempu minerali à tempu vighjitali, ochju di vita in l’acqui è in l’arii, tistimoniu di un bilanciu fini, fragili di tanta richezza.
Scarsi sò i tarritori induva biodiversità rima cù attività umana. Puru, quì l’Omini ani sempri sapiutu priservà l’ambiu, travaddà incù è grazii à eddu, senza dumà lu. Senza dubbitu avarani sempri percipitu tutti i ricchezzi arricati da u fiumi milleniu. È parchi ani piddatu cura di prucaccià i so ricchezzi cù righjiru, si sò fatti veda senza fondu. Scumbuliscendu si cù i so zerghi è i so vogli, ani trovu nantu à e so spondi biddezza, robba, calmu è libartà.
Hè in stu rispettu di a natura stessa di u Taravu chì hè natu u sintimu spartu di un tisoru senza paragonu. A vaddi ricala brisgiuli di culori è multitudini di sfrumbulimi di branu, friscura è serenità d’istatina, spampiddi è generosità di vaghjimi, parè di misteriu è di putenza d’inguernu.
Cuabitazione felici,
natura dancia.
Priservà sputichezza è naturalità, appaghjà attività è biodiversità, hè assicurà l’armunia di u tarritoriu.
A vaddi di u Taravu
hè una tarra di cuntrasti
A vaddi di u Taravu hè una tarra di cuntrasti, in cori ci stà u fiumi chì cunstituiscia a leia eterna : trà a muntagna è u mari, trà l’Omini è a natura, trà generazioni, trà passatu è avvena. Prima chjassu di muntagnera, u Taravu s’afferma oghji com’è u puntellu di un sviluppu di u tarritoriu in u rispettu di a so identità.
Quandu l’Omu hà staghjunatu prughjetti di sviluppu stampati di mudernità è di tecnicità, sarà parchì hè firmata « una bedda addurmintata » chì a vaddi di u Taravu s’hà tinutu i so ricchezzi è u so bilanciu. È hè à a misura di sta armunia chì ci nascini o ci si mantenani l’attività : un’ agricultura diversa favurizata da u spienu d’acqua è a fertilità di i tarri, un artigianatu di tradizioni.
Chjassi di girandulata, parcorsi di pesca, siti di bagnu, avvinturi par i chjuchi è maravidda par i maiori sò dinò i chjavi di un turisimu verdi appaghjendu accolta, gastrunumia, arti cuntempuraneu è arti prestoricu, com’è dinò scuparta di a natura.
Fiumi salvaticu à l’accenti tenneri o tumultuosu,
forma è leia di u tarritoriu.